አዲስ አበባ | ግንቦት 7 ቀን 2018 ዓ.ምበሥራ ቦታ የሚፈጸሙ ወሲባዊ ብዝበዛና ጥቃቶችን ለመከላከል በሚያስችለው ረቂቅ ደንብ ላይ ያተኮረ የምክክር መድረክ ተካሄደ።መድረኩን የሴቶችና ማህበራዊ ጉዳይ ሚኒስቴር፣ የፌዴራል ሲቪል ሰርቪስ ኮሚሽን እና የተባበሩት መንግስታት ድርጅት የፆታዊ ብዝበዛና ጥቃት መከላከል (UN/PSEA) ኔትወርክ በጋራ በመሆን ነው ያዘጋጁት።የዚህ ረቂቅ ደንብ መዘጋጀት ዋና ዓላማ በሥራ ቦታ ማንኛውም ዓይነት የፆታዊ ብዝበዛና ጥቃት እንዳይፈጸም አስቀድሞ መከላከል ሲሆን፤ ከማንኛውም ዓይነት ትንኮሳ ነፃ የሆነ፣ ምቹና ደህንነቱ የተጠበቀ የሥራ አካባቢን መፍጠር መሆኑ በመድረኩ ላይ ተገልጿል።የመድረኩ አዘጋጆች እንደጠቆሙት፤ ይህ ረቂቅ ደንብ በተቋማት ውስጥ የአስተሳሰብ ለውጥ ለማምጣትና ፆታዊ ጥቃቶችን ለመግታት እንደ ትልቅ መሣሪያ ያገለግላል። በውይይቱም የሚከተሉት ዋና ዋና ነጥቦች ትኩረት ተሰጥቷቸዋል፡፡• የመከላከያ ማዕቀፎችን መዘርጋት፦ ፆታዊ ጥቃቶችና ብዝበዛዎች ሳይከሰቱ አስቀድሞ ለመለየትና ለመከላከል የሚያስችሉ ጠንካራ አሰራሮችንና ሥርዓቶችን በደንቡ ላይ ማካተት።• ደህንነቱ የተጠበቀ የሥራ አካባቢ መፍጠር፦ ሠራተኞች ያለ ምንም ስጋትና ፍርሃት፣ ክብራቸው ተጠብቆ ሥራቸውን በነፃነት የሚያከናውኑበትን ሙያዊ ባህልና ሥነ-ምግባር ማሳደግ።• የሥነ-ምግባር ደንቡን ደረጃውን የጠበቀ ማድረግ፦ የፌዴራል ሲቪል ሰርቪስ የሥነ-ምግባር መመሪያዎችን ከዓለም አቀፍ የPSEA ስታንዳርዶች ጋር በማጣጣም ወጥ የሆነ ጥበቃ እንዲኖር ማድረግ።የሴቶችና ማህበራዊ ጉዳይ ሚኒስቴር እና የፌዴራል ሲቪል ሰርቪስ ኮሚሽን ተወካዮች በበኩላቸው፤ ውጤታማ የሕዝብ አገልግሎት ለመስጠት ከጥቃት ነፃ የሆነ የሥራ አካባቢ መኖር ቅድመ ሁኔታ መሆኑን አስገንዝበዋል።ይህ ረቂቅ ደንብ ሕጋዊ አስፈላጊነት ብቻ ሳይሆን ዘመናዊ፣ ሥነ-ምግባር የተላበሰና በዜጎች ላይ ያተኮረ የመንግሥት አገልግሎት ለመገንባት የሚደረግ መሠረታዊ እርምጃ መሆኑንም አክለው ገልጸዋል።የምክክር መድረኩ ተሳታፊዎች ረቂቅ ደንቡን በሥራ ላይ ለማዋል የሚያስችሉ መመሪያዎችን ማዘጋጀት አስፈላጊ መሆኑን ጠቅሰው፤ በቀጣይም በየመንግሥት መሥሪያ ቤቱ የግንዛቤ ማስጨበጫ ሥልጠናዎችን መስጠት እንደሚገባ አሳስበዋል።በዚህም እያንዳንዱ የመንግሥት ሠራተኛ በደንቡ የተካተቱ መብትና ግዴታዎችን ተረድቶ ለተግባራዊነቱ የበኩሉን አስተዋፅኦ ማድረግ እንዳለበት በውይይቱ ማጠቃለያ ላይ ተመላክቷል፡፡